Punjab Infoline

ਪੰਜਾਬੀ

Canada Vehicle Theft: ਬਰੈਂਪਟਨ ’ਚ 36 ਲੱਖ ਡਾਲਰ ਦੀ ਟਰੱਕ-ਟਰੇਲਰ ਚੋਰੀ ਦਾ ਪਰਦਾਫਾਸ਼, ਪੰਜਾਬੀ ਮੂਲ ਦੇ 4 ਗ੍ਰਿਫ਼ਤਾਰ, 2 ਫਰਾਰ

20 Nov, 2026 09:11 AM

Canada Vehicle Theft: ਕੈਨੇਡਾ ਦੇ ਗਰੇਟਰ ਟੋਰਾਂਟੋ ਇਲਾਕੇ ਵਿੱਚ ਟਰੈਕਟਰਾਂ, ਟਰੇਲਰਾਂ ਅਤੇ ਹੋਰ ਭਾਰੀ ਵਪਾਰਕ ਵਾਹਨਾਂ ਦੀ ਚੋਰੀ ਕਰਕੇ ਉਨ੍ਹਾਂ ਨੂੰ ਗ਼ੈਰਕਾਨੂੰਨੀ ਢੰਗ ਨਾਲ ਟਰਾਂਸਪੋਰਟ ਕਾਰੋਬਾਰ ਵਿੱਚ ਵਰਤਣ ਵਾਲੇ ਕਥਿਤ ਗਰੋਹ ਦਾ ਯਾਰਕ ਰਿਜਨਲ ਪੁਲੀਸ ਨੇ ਪਰਦਾਫਾਸ਼ ਕੀਤਾ ਹੈ। ਇਸ ਮਾਮਲੇ ਵਿੱਚ ਬਰੈਂਪਟਨ ਦੇ ਪੰਜਾਬੀ ਮੂਲ ਦੇ ਚਾਰ ਵਿਅਕਤੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਗਿਆ ਹੈ, ਜਦਕਿ ਦੋ ਹੋਰ ਸ਼ੱਕੀਆਂ ਦੀ ਭਾਲ ਜਾਰੀ ਹੈ। ਪੁਲੀਸ ਨੇ 17 ਟਰੈਕਟਰਾਂ ਅਤੇ 20 ਟਰੇਲਰਾਂ ਸਮੇਤ ਕੁੱਲ 37 ਵਾਹਨ ਬਰਾਮਦ ਕੀਤੇ ਹਨ, ਜਿਨ੍ਹਾਂ ਦੀ ਅੰਦਾਜ਼ਨ ਕੀਮਤ 36 ਲੱਖ ਡਾਲਰ ਹੈ।

‘ਪ੍ਰੋਜੈਕਟ ਨੈਸ਼ਵਿਲ’ ਤਹਿਤ ਸ਼ੁਰੂ ਕੀਤੀ ਗਈ ਜਾਂਚ

ਪੁਲੀਸ ਅਨੁਸਾਰ ਆਟੋ ਕਾਰਗੋ ਥੈਫਟ ਯੂਨਿਟ ਨੇ ਅਗਸਤ 2026 ਵਿੱਚ ‘ਪ੍ਰੋਜੈਕਟ ਨੈਸ਼ਵਿਲ’ ਦੇ ਨਾਂ ਹੇਠ ਜਾਂਚ ਸ਼ੁਰੂ ਕੀਤੀ ਸੀ। ਜਾਂਚ ਦਾ ਮੁੱਖ ਉਦੇਸ਼ ਸੈਮੀ-ਟਰੈਕਟਰਾਂ ਅਤੇ 53 ਫੁੱਟ ਲੰਬੇ ਟਰੇਲਰਾਂ ਦੀ ਚੋਰੀ ਅਤੇ ਉਨ੍ਹਾਂ ਨੂੰ ਵੱਖ-ਵੱਖ ਟਰਾਂਸਪੋਰਟ ਕੰਪਨੀਆਂ ਰਾਹੀਂ ਵਰਤੋਂ ਵਿੱਚ ਲਿਆਉਣ ਵਾਲੇ ਨੈੱਟਵਰਕ ਦੀ ਪਛਾਣ ਕਰਨਾ ਸੀ। ਜਾਂਚ ਅਧਿਕਾਰੀਆਂ ਨੇ ਇਸ ਨੈੱਟਵਰਕ ਨਾਲ ਕਥਿਤ ਤੌਰ ’ਤੇ ਜੁੜੇ ਛੇ ਵਿਅਕਤੀਆਂ ਦੀ ਪਛਾਣ ਕੀਤੀ।

ਪੁਲੀਸ ਦਾ ਦਾਅਵਾ ਹੈ ਕਿ ਚੋਰੀ ਕੀਤੇ ਵਾਹਨਾਂ ਨੂੰ ਕਾਨੂੰਨੀ ਦਿਖਾਉਣ ਲਈ ਉਨ੍ਹਾਂ ਦੇ ਵਾਹਨ ਪਛਾਣ ਨੰਬਰਾਂ (VIN) ਨਾਲ ਛੇੜਛਾੜ ਕੀਤੀ ਜਾਂਦੀ ਸੀ, ਤਾਂ ਜੋ ਜਾਂਚ ਏਜੰਸੀਆਂ ਦੀ ਨਜ਼ਰ ਤੋਂ ਬਚਿਆ ਜਾ ਸਕੇ।

ਛਾਪੇ ਦੌਰਾਨ 17 ਟਰੈਕਟਰ ਅਤੇ 20 ਟਰੇਲਰ ਜ਼ਬਤ

ਜਾਂਚ ਦੇ ਆਧਾਰ ’ਤੇ ਪੁਲੀਸ ਨੇ 7 ਅਕਤੂਬਰ 2026 ਨੂੰ ਬਰੈਂਪਟਨ ਦੇ ਇੱਕ ਵਪਾਰਕ ਟਰੱਕਿੰਗ ਯਾਰਡ ਵਿੱਚ ਸਰਚ ਵਾਰੰਟ ਤਹਿਤ ਛਾਪਾ ਮਾਰਿਆ। ਇਸ ਦੌਰਾਨ 17 ਟਰੈਕਟਰ ਅਤੇ 20 ਟਰੇਲਰ ਜ਼ਬਤ ਕੀਤੇ ਗਏ। ਪੁਲੀਸ ਮੁਤਾਬਕ ਇਨ੍ਹਾਂ ਵਿੱਚੋਂ ਕਈ ਵਾਹਨਾਂ ਦੇ VIN ਨੰਬਰ ਚੋਰੀਸ਼ੁਦਾ ਜਾਂ ਬਦਲੇ ਹੋਏ ਸਨ। ਵਾਹਨਾਂ ਦੀ ਅਸਲ ਪਛਾਣ ਲੁਕਾਉਣ ਲਈ ਉਨ੍ਹਾਂ ਦੇ ਡੈਕਲ ਅਤੇ ਸਟਿੱਕਰ ਵੀ ਬਦਲੇ ਗਏ ਸਨ।

ਚਾਰ ਪੰਜਾਬੀ ਮੂਲ ਦੇ ਵਿਅਕਤੀ ਗ੍ਰਿਫ਼ਤਾਰ

ਇਸ ਮਾਮਲੇ ਵਿੱਚ ਗ੍ਰਿਫ਼ਤਾਰ ਕੀਤੇ ਗਏ ਵਿਅਕਤੀਆਂ ਦੀ ਪਛਾਣ ਮਧੂਸੁਦਨ ਅਟਵਾਲ (35), ਸ਼ਰਨਦੀਪ ਅਟਵਾਲ (41), ਗੁਰਲਾਲ ਸਿੰਘ (30) ਅਤੇ ਅੰਮ੍ਰਿਤਸ਼ੇਰ ਸਿੰਘ (28) ਵਜੋਂ ਹੋਈ ਹੈ।

ਮਧੂਸੁਦਨ ਅਟਵਾਲ ਖ਼ਿਲਾਫ਼ ਚੋਰੀ ਦੀ ਜਾਇਦਾਦ ਰੱਖਣ ਦੇ ਪੰਜ, 5,000 ਡਾਲਰ ਤੋਂ ਵੱਧ ਦੀ ਧੋਖਾਧੜੀ ਅਤੇ ਚੋਰੀ ਦਾ ਸਾਮਾਨ ਵੇਚਣ ਦੇ ਇਰਾਦੇ ਨਾਲ ਰੱਖਣ ਦੇ ਪੰਜ ਦੋਸ਼ ਲਾਏ ਗਏ ਹਨ।

ਸ਼ਰਨਦੀਪ ਅਟਵਾਲ ਖ਼ਿਲਾਫ਼ ਚੋਰੀ ਦੀ ਜਾਇਦਾਦ ਰੱਖਣ ਦੇ ਨੌਂ, 5,000 ਡਾਲਰ ਤੋਂ ਵੱਧ ਦੀ ਧੋਖਾਧੜੀ ਅਤੇ ਚੋਰੀ ਦਾ ਸਾਮਾਨ ਤਸਕਰੀ ਕਰਨ ਦੇ ਇਰਾਦੇ ਨਾਲ ਰੱਖਣ ਦੇ ਨੌਂ ਦੋਸ਼ ਹਨ।

ਇਸੇ ਤਰ੍ਹਾਂ ਗੁਰਲਾਲ ਸਿੰਘ (30) ਖ਼ਿਲਾਫ਼ ਚੋਰੀ ਦੀ ਜਾਇਦਾਦ ਰੱਖਣ ਦੇ ਪੰਜ, 5,000 ਡਾਲਰ ਤੋਂ ਵੱਧ ਦੀ ਧੋਖਾਧੜੀ ਅਤੇ ਚੋਰੀ ਦਾ ਸਾਮਾਨ ਵੇਚਣ ਦੇ ਇਰਾਦੇ ਨਾਲ ਰੱਖਣ ਦੇ ਪੰਜ ਦੋਸ਼ ਲਾਏ ਗਏ ਹਨ।

ਅੰਮ੍ਰਿਤਸ਼ੇਰ ਸਿੰਘ ਖ਼ਿਲਾਫ਼ ਚੋਰੀ ਦੀ ਜਾਇਦਾਦ ਰੱਖਣ ਦੇ 10 ਅਤੇ 5,000 ਡਾਲਰ ਤੋਂ ਵੱਧ ਦੀ ਧੋਖਾਧੜੀ ਅਤੇ ਚੋਰੀ ਦਾ ਸਾਮਾਨ ਤਸਕਰੀ ਕਰਨ ਦੇ ਇਰਾਦੇ ਨਾਲ ਰੱਖਣ ਦੇ ਅੱਠ ਦੋਸ਼ ਲਾਏ ਗਏ ਹਨ।

ਦੋ ਹੋਰ ਸ਼ੱਕੀਆਂ ਦੀ ਪੁਲੀਸ ਨੂੰ ਭਾਲ

ਪੁਲੀਸ ਨੂੰ ਇਸ ਮਾਮਲੇ ਵਿੱਚ ਗੁਰਲਾਲ ਸਿੰਘ (35) ਅਤੇ ਪ੍ਰੀਤਮ ਰਤਨ (32) ਦੀ ਵੀ ਭਾਲ ਹੈ। ਦੋਵਾਂ ਖ਼ਿਲਾਫ਼ ਚੋਰੀ ਦੀ ਜਾਇਦਾਦ ਰੱਖਣ ਅਤੇ ਧੋਖਾਧੜੀ ਦੇ ਦੋਸ਼ਾਂ ਸਬੰਧੀ ਗ੍ਰਿਫ਼ਤਾਰੀ ਵਾਰੰਟ ਜਾਰੀ ਕੀਤੇ ਗਏ ਹਨ।

ਪੁਲੀਸ ਨੇ ਲੋਕਾਂ ਨੂੰ ਅਪੀਲ ਕੀਤੀ ਹੈ ਕਿ ਇਨ੍ਹਾਂ ਸ਼ੱਕੀਆਂ ਜਾਂ ਮਾਮਲੇ ਨਾਲ ਸਬੰਧਿਤ ਕੋਈ ਵੀ ਜਾਣਕਾਰੀ ਹੋਣ ’ਤੇ ਆਟੋ ਕਾਰਗੋ ਥੈਫਟ ਯੂਨਿਟ ਨਾਲ 1-866-876-5423, ਐਕਸਟੈਂਸ਼ਨ 6651 ’ਤੇ ਸੰਪਰਕ ਕੀਤਾ ਜਾਵੇ।

ਜ਼ਿਕਰਯੋਗ ਹੈ ਕਿ ਮੁਲਜ਼ਮਾਂ ਖ਼ਿਲਾਫ਼ ਲਾਏ ਗਏ ਦੋਸ਼ ਹਾਲੇ ਅਦਾਲਤ ਵਿੱਚ ਸਾਬਤ ਨਹੀਂ ਹੋਏ ਹਨ। ਕਾਨੂੰਨ ਅਨੁਸਾਰ ਅਦਾਲਤ ਵੱਲੋਂ ਦੋਸ਼ੀ ਕਰਾਰ ਦਿੱਤੇ ਜਾਣ ਤੱਕ ਸਾਰੇ ਮੁਲਜ਼ਮ ਬੇਗੁਨਾਹ ਮੰਨੇ ਜਾਣਗੇ।

Latest News