ਪਰਵੇਸ਼ ਵਰਮਾ ਦੀ ਦੀਵਾਲੀ ਪਾਰਟੀ ’ਚ ਹੁੱਕਾ ਪਰੋਸਣ ’ਤੇ ਸਿਆਸੀ ਵਿਵਾਦ, ‘ਆਪ’ ਨੇ ਭਾਜਪਾ ਨੂੰ ਘੇਰਿਆ
Delhi Hukka Controversy: ਦਿੱਲੀ ਦੇ ਮੰਤਰੀ ਪਰਵੇਸ਼ ਵਰਮਾ ਦੀ ਦੀਵਾਲੀ ਪਾਰਟੀ ਵਿੱਚ ਹੁੱਕਾ ਪਰੋਸਣ ਦੀਆਂ ਤਸਵੀਰਾਂ ਸਾਹਮਣੇ ਆਉਣ ਤੋਂ ਬਾਅਦ ਭਾਜਪਾ ਅਤੇ ਆਮ ਆਦਮੀ ਪਾਰਟੀ (ਆਪ) ਵਿਚਾਲੇ ਸਿਆਸੀ ਵਿਵਾਦ ਛਿੜ ਗਿਆ ਹੈ। ‘ਆਪ’ ਨੇ ਇਸ ਮਾਮਲੇ ਨੂੰ ਲੈ ਕੇ ਭਾਜਪਾ ਦੇ ਨਸ਼ਾ ਮੁਕਤੀ ਸਬੰਧੀ ਦਾਅਵਿਆਂ ’ਤੇ ਸਵਾਲ ਚੁੱਕੇ ਹਨ, ਜਦਕਿ ਭਾਜਪਾ ਨੇ ਮੰਤਰੀ ਦਾ ਬਚਾਅ ਕਰਦਿਆਂ ਹੁੱਕੇ ਨੂੰ ਸੱਭਿਆਚਾਰਕ ਪਰੰਪਰਾ ਨਾਲ ਜੋੜਿਆ ਹੈ।
ਸੌਰਭ ਭਾਰਦਵਾਜ ਨੇ ਪਾਰਟੀ ਦੇ ਪ੍ਰਬੰਧਾਂ ’ਤੇ ਚੁੱਕੇ ਸਵਾਲ
‘ਆਪ’ ਦਿੱਲੀ ਦੇ ਪ੍ਰਧਾਨ ਸੌਰਭ ਭਾਰਦਵਾਜ ਨੇ ਪੱਤਰਕਾਰ ਸੁਧੀਰ ਚੌਧਰੀ ਦੀ ਮੌਜੂਦਗੀ ਵਾਲੇ ਇਸ ਇਕੱਠ ’ਤੇ ਸਵਾਲ ਚੁੱਕੇ। ਉਨ੍ਹਾਂ ਪੁੱਛਿਆ ਕਿ ਕੀ ਇਸ ਪਾਰਟੀ ਲਈ ਸਰਕਾਰੀ ਬੰਗਲੇ ਅਤੇ ਜਨਤਕ ਪੈਸੇ ਦੀ ਵਰਤੋਂ ਕੀਤੀ ਗਈ ਸੀ?
‘ਆਪ’ ਨੇ ਭਾਜਪਾ ਦੇ ਪੰਜਾਬ ਵਿੱਚ ਨਸ਼ਾ ਮੁਕਤੀ ਸਬੰਧੀ ਦਾਅਵਿਆਂ ’ਤੇ ਵੀ ਤਨਜ਼ ਕੱਸਿਆ। ਪਾਰਟੀ ਨੇ ਕਿਹਾ ਕਿ ਇੱਕ ਪਾਸੇ ਮੁੱਖ ਮੰਤਰੀ ਰੇਖਾ ਗੁਪਤਾ ਆਨਲਾਈਨ ਸ਼ਰਾਬ ਵੇਚ ਰਹੀ ਹੈ ਅਤੇ ਦੂਜੇ ਪਾਸੇ ਮੰਤਰੀ ਸੁੱਕੇ ਨਸ਼ੇ ਪਰੋਸ ਰਹੇ ਹਨ।
ਭਾਜਪਾ ਨੇ ਹੁੱਕੇ ਨੂੰ ਸੱਭਿਆਚਾਰਕ ਪਰੰਪਰਾ ਦੱਸਿਆ
ਦੂਜੇ ਪਾਸੇ, ਭਾਜਪਾ ਬੁਲਾਰੇ ਅਜੇ ਸਹਿਰਾਵਤ ਅਤੇ ਪ੍ਰਵੀਨ ਸ਼ੰਕਰ ਕਪੂਰ ਨੇ ਪਰਵੇਸ਼ ਵਰਮਾ ਦਾ ਬਚਾਅ ਕੀਤਾ। ਉਨ੍ਹਾਂ ਹੁੱਕੇ ਨੂੰ ਜਾਟ ਭਾਈਚਾਰੇ ਦੀ ਸੱਭਿਆਚਾਰਕ ਪਛਾਣ, ਪੰਚਾਇਤੀ ਪਰੰਪਰਾ ਅਤੇ ਸਮਾਜਿਕ ਏਕਤਾ ਦਾ ਪ੍ਰਤੀਕ ਦੱਸਿਆ।
ਭਾਜਪਾ ਆਗੂਆਂ ਨੇ ਸਪੱਸ਼ਟ ਕੀਤਾ ਕਿ ਪਾਰਟੀ ਵਿੱਚ ਪਿੰਡਾਂ ਦੀਆਂ ਚੌਪਾਲਾਂ ਵਿੱਚ ਵਰਤੇ ਜਾਣ ਵਾਲੇ ਪਰੰਪਰਾਗਤ ਹੁੱਕੇ ਸਨ, ਜਿਨ੍ਹਾਂ ਵਿੱਚ ਤੰਬਾਕੂ ਦੀ ਮਾਤਰਾ ਨਾਮਾਤਰ ਸੀ। ਉਨ੍ਹਾਂ ਕਿਹਾ ਕਿ ਇਹ ਪਾਬੰਦੀਸ਼ੁਦਾ ਹੁੱਕਾ ਬਾਰਾਂ ਤੋਂ ਵੱਖਰਾ ਸੀ।
2017 ਵਿੱਚ ਦਿੱਲੀ ’ਚ ਹੁੱਕਾ ਬਾਰਾਂ ’ਤੇ ਲੱਗੀ ਸੀ ਪਾਬੰਦੀ
ਜ਼ਿਕਰਯੋਗ ਹੈ ਕਿ ਦਿੱਲੀ ਵਿੱਚ ਆਮ ਆਦਮੀ ਪਾਰਟੀ ਦੀ ਸਰਕਾਰ ਨੇ 2017 ਵਿੱਚ ਹੁੱਕਾ ਬਾਰਾਂ ’ਤੇ ਪੂਰਨ ਪਾਬੰਦੀ ਲਗਾਈ ਸੀ। ਹਾਲਾਂਕਿ, ਬਾਅਦ ਵਿੱਚ ਦਿੱਲੀ ਹਾਈ ਕੋਰਟ ਨੇ 2019 ਅਤੇ 2021 ਵਿੱਚ ਅੰਤਰਿਮ ਰਾਹਤ ਦਿੰਦਿਆਂ ਨਿਕੋਟੀਨ-ਮੁਕਤ ਹਰਬਲ ਹੁੱਕੇ ਪਰੋਸਣ ਦੀ ਇਜਾਜ਼ਤ ਦਿੱਤੀ ਸੀ।
ਕੋਟਪਾ (COTPA) 2003 ਤਹਿਤ ਜਨਤਕ ਥਾਵਾਂ ’ਤੇ ਧੂਮਰਪਾਨ ’ਤੇ ਪਾਬੰਦੀ ਹੈ। ਇਸ ਕਾਰਨ ਤੰਬਾਕੂ ਵਾਲੇ ਅਤੇ ਹਰਬਲ ਹੁੱਕਿਆਂ ਵਿਚਾਲੇ ਅੰਤਰ ਕਾਨੂੰਨੀ ਬਹਿਸ ਦਾ ਕੇਂਦਰ ਬਣਿਆ ਹੋਇਆ ਹੈ।
```