ਯੂਕੇ ਵਿੱਚ ਘੱਟੋ-ਘੱਟ 70 ਨਾਬਾਲਗ ਲੜਕੀਆਂ ਦਾ ਆਨਲਾਈਨ ਜਿਨਸੀ ਸ਼ੋਸ਼ਣ ਕਰਨ ਦੇ ਮਾਮਲੇ ਵਿੱਚ ਮੁੰਬਈ ਦੇ 27 ਸਾਲਾ ਵਿਦਿਆਰਥੀ ਬਿਲਾਲ ਕਾਜ਼ੀ ਨੂੰ 30 ਸਾਲ ਦੀ ਕੈਦ ਦੀ ਸਜ਼ਾ ਸੁਣਾਈ ਗਈ ਹੈ। ਕਾਜ਼ੀ ਨੇ ਅਗਸਤ 2021 ਤੋਂ ਅਗਸਤ 2025 ਦਰਮਿਆਨ ਸਨੈਪਚੈਟ, ਵਿੰਕ ਅਤੇ ਰੋਬਲੌਕਸ ਵਰਗੀਆਂ ਐਪਾਂ ਰਾਹੀਂ 10 ਤੋਂ 17 ਸਾਲ ਦੀ ਉਮਰ ਦੀਆਂ ਲੜਕੀਆਂ ਨੂੰ ਨਿਸ਼ਾਨਾ ਬਣਾਇਆ ਸੀ।

ਕਾਜ਼ੀ ਨੂੰ ਪੈਰੋਲ ਲਈ ਯੋਗ ਹੋਣ ਤੋਂ ਪਹਿਲਾਂ ਘੱਟੋ-ਘੱਟ 20 ਸਾਲ ਜੇਲ੍ਹ ਵਿੱਚ ਕੱਟਣੇ ਪੈਣਗੇ। ਇਸ ਤੋਂ ਇਲਾਵਾ, ਉਸ ਦਾ ਨਾਮ ਉਮਰ ਭਰ ਲਈ ਜਿਨਸੀ ਅਪਰਾਧੀਆਂ ਦੇ ਰਜਿਸਟਰ ਵਿੱਚ ਦਰਜ ਰਹੇਗਾ। ਚੈਸ਼ਾਇਰ ਕਾਂਸਟੇਬੁਲਰੀ ਵੱਲੋਂ ਸਾਂਝੀ ਕੀਤੀ ਗਈ ਜਾਣਕਾਰੀ ਅਨੁਸਾਰ, ਭਾਰਤ ਤੋਂ ਆਇਆ ਕਾਜ਼ੀ ਯੂਨੀਵਰਸਿਟੀ ਆਫ਼ ਚੈਸਟਰ ਵਿੱਚ ਪੜ੍ਹ ਰਿਹਾ ਸੀ। ਉਹ ਖੁਦ ਨੂੰ 14 ਸਾਲ ਦਾ ਗੋਰਾ ਬ੍ਰਿਟਿਸ਼ ਕਿਸ਼ੋਰ ਦੱਸ ਕੇ ਲੜਕੀਆਂ ਨੂੰ ਆਪਣੇ ਨਾਲ ਰਿਸ਼ਤੇ ਵਿੱਚ ਹੋਣ ਦਾ ਵਿਸ਼ਵਾਸ ਦਿਵਾਉਂਦਾ ਸੀ। ਇਸ ਤੋਂ ਬਾਅਦ ਉਹ ਉਨ੍ਹਾਂ ਨੂੰ ਹੋਰ ਅਸ਼ਲੀਲ ਤਸਵੀਰਾਂ ਅਤੇ ਵੀਡੀਓਜ਼ ਭੇਜਣ ਲਈ ਮਜਬੂਰ ਕਰਦਾ ਸੀ ਅਤੇ ਇਨਕਾਰ ਕਰਨ 'ਤੇ ਪਹਿਲਾਂ ਭੇਜੀਆਂ ਤਸਵੀਰਾਂ ਦੂਜਿਆਂ ਨਾਲ ਸਾਂਝੀਆਂ ਕਰਨ ਦੀ ਧਮਕੀ ਦਿੰਦਾ ਸੀ।

ਸ਼ੁੱਕਰਵਾਰ ਨੂੰ ਚੈਸਟਰ ਕਰਾਊਨ ਕੋਰਟ ਵਿੱਚ ਅਸ਼ਲੀਲ ਤਸਵੀਰਾਂ ਬਣਾਉਣ, ਬਲੈਕਮੇਲ ਕਰਨ ਅਤੇ ਬੱਚੇ ਨੂੰ ਜਿਨਸੀ ਗਤੀਵਿਧੀਆਂ ਵਿੱਚ ਸ਼ਾਮਲ ਹੋਣ ਲਈ ਉਕਸਾਉਣ ਸਮੇਤ 37 ਦੋਸ਼ ਕਬੂਲ ਕਰਨ ਤੋਂ ਬਾਅਦ ਉਸ ਨੂੰ ਸਜ਼ਾ ਸੁਣਾਈ ਗਈ। ਉਸ ਦੀ ਇਹ ਅਪਰਾਧਿਕ ਮੁਹਿੰਮ 2021 ਤੋਂ 2025 ਤੱਕ ਚੱਲੀ।

14 ਸਾਲ ਦਾ ਲੜਕਾ ਬਣ ਕੇ ਕਰਦਾ ਸੀ ਗੱਲਬਾਤ

ਮੁੰਬਈ ਦਾ ਰਹਿਣ ਵਾਲਾ ਕਾਜ਼ੀ ਬਰਮਿੰਘਮ ਯੂਨੀਵਰਸਿਟੀ ਵਿੱਚ ਤਬਦੀਲ ਹੋਣ ਤੋਂ ਪਹਿਲਾਂ ਚੈਸਟਰ ਵਿੱਚ ਪੀਐਚਡੀ ਕਰ ਰਿਹਾ ਸੀ, ਜਿੱਥੇ ਉਸ ਨੇ ਕੈਮਿਸਟਰੀ ਦੀ ਪੜ੍ਹਾਈ ਕੀਤੀ। ਉਸ ਦੇ ਅਪਰਾਧਾਂ ਦੀ ਜਾਂਚ ਦਸੰਬਰ 2021 ਵਿੱਚ ਸ਼ੁਰੂ ਹੋਈ, ਜਦੋਂ ਇੱਕ ਪੀੜਤਾ ਨੇ ਡਰਬੀਸ਼ਾਇਰ ਪੁਲੀਸ ਕੋਲ ਸ਼ਿਕਾਇਤ ਦਰਜ ਕਰਵਾਈ।

ਪੀੜਤਾ ਨੇ ਦੱਸਿਆ ਕਿ ਜਦੋਂ ਉਹ 13 ਸਾਲ ਦੀ ਸੀ ਤਾਂ ਉਸ ਨੇ ਸਨੈਪਚੈਟ 'ਤੇ ਕਾਜ਼ੀ ਨਾਲ ਗੱਲਬਾਤ ਸ਼ੁਰੂ ਕੀਤੀ ਸੀ। ਉਸ ਨੂੰ ਲੱਗਦਾ ਸੀ ਕਿ ਕਾਜ਼ੀ ਵੀ ਉਸ ਦੀ ਹੀ ਉਮਰ ਦਾ ਹੈ, ਪਰ ਜਲਦੀ ਹੀ ਉਨ੍ਹਾਂ ਦੀ ਗੱਲਬਾਤ ਅਸ਼ਲੀਲ ਹੋ ਗਈ ਅਤੇ ਕਾਜ਼ੀ ਉਸ ਨੂੰ ਕਈ ਅਣਉਚਿਤ ਸਵਾਲ ਪੁੱਛਣ ਲੱਗਾ।

ਰਿਪੋਰਟ ਅਨੁਸਾਰ, ਜੁਲਾਈ 2021 ਵਿੱਚ ਜਦੋਂ ਪੀੜਤਾ ਨੇ ਕਾਜ਼ੀ ਨੂੰ ਕਿਹਾ ਕਿ ਉਹ ਸਿਰਫ਼ ਦੋਸਤ ਬਣਨਾ ਚਾਹੁੰਦੀ ਹੈ ਅਤੇ ਹੁਣ ਉਸ ਨੂੰ ਤਸਵੀਰਾਂ ਨਹੀਂ ਭੇਜਣਾ ਚਾਹੁੰਦੀ ਤਾਂ ਉਸ ਨੇ ਗਾਲੀ-ਗਲੋਚ ਸ਼ੁਰੂ ਕਰ ਦਿੱਤੀ। ਉਸ ਨੇ ਪੀੜਤਾ ਨੂੰ ਭੱਦੇ ਨਾਵਾਂ ਨਾਲ ਬੁਲਾਇਆ ਅਤੇ ਦਾਅਵਾ ਕੀਤਾ ਕਿ ਉਹ ਉਸ ਦੀ ਜਾਇਦਾਦ ਹੈ। ਇਸ ਤੋਂ ਬਾਅਦ ਉਸ ਨੇ ਧਮਕੀ ਦਿੱਤੀ ਕਿ ਜੇਕਰ ਉਸ ਦੀਆਂ ਮੰਗਾਂ ਨਾ ਮੰਨੀਆਂ ਗਈਆਂ ਤਾਂ ਉਹ ਪਹਿਲਾਂ ਸਾਂਝੀਆਂ ਕੀਤੀਆਂ ਫੋਟੋਆਂ ਅਤੇ ਵੀਡੀਓਜ਼ ਉਸ ਦੇ ਦੋਸਤਾਂ ਨੂੰ ਭੇਜ ਦੇਵੇਗਾ।

ਜਾਂਚ ਦੌਰਾਨ 70 ਪੀੜਤਾਂ ਦੀ ਹੋਈ ਪਛਾਣ

ਮਈ 2022 ਵਿੱਚ ਜਾਂਚ ਦੌਰਾਨ ਇਹ ਪਤਾ ਲੱਗਣ ਤੋਂ ਬਾਅਦ ਕਿ ਕਾਜ਼ੀ ਦਾ ਆਖਰੀ ਜਾਣਿਆ ਪਤਾ ਚੈਸਟਰ ਵਿੱਚ ਸੀ, ਚੈਸ਼ਾਇਰ ਕਾਂਸਟੇਬੁਲਰੀ ਦੀ ਆਨਲਾਈਨ ਚਾਈਲਡ ਐਬਿਊਜ਼ ਇਨਵੈਸਟੀਗੇਸ਼ਨ ਟੀਮ (OCAIT) ਨੇ ਮਾਮਲੇ ਦੀ ਜਾਂਚ ਆਪਣੇ ਹੱਥਾਂ ਵਿੱਚ ਲੈ ਲਈ। ਟੀਮ ਨੇ ਜਾਂਚ ਦੌਰਾਨ 180 ਸੰਭਾਵੀ ਪੀੜਤਾਂ ਦੀ ਪਛਾਣ ਕੀਤੀ।

ਵਿਸ਼ੇਸ਼ ਵਿਕਟਿਮ ਆਈਡੈਂਟੀਫਿਕੇਸ਼ਨ ਅਧਿਕਾਰੀਆਂ ਨੇ ਕਾਜ਼ੀ ਦੇ ਡਿਵਾਈਸ ਤੋਂ ਮਿਲੇ ਯੂਜ਼ਰਨੇਮ ਅਤੇ ਹੋਰ ਡੇਟਾ ਦੀ ਮਦਦ ਨਾਲ ਉਸ ਵੱਲੋਂ ਨਿਸ਼ਾਨਾ ਬਣਾਈਆਂ ਗਈਆਂ ਲੜਕੀਆਂ ਦਾ ਪਤਾ ਲਗਾਇਆ। ਇਸ ਜਾਂਚ ਵਿੱਚ ਯੂਕੇ ਦੀਆਂ 45 ਪੁਲੀਸ ਫੋਰਸਾਂ ਵਿੱਚੋਂ 28 ਦੇ ਅਧਿਕਾਰ ਖੇਤਰਾਂ ਵਿੱਚੋਂ 70 ਪੀੜਤਾਂ ਦੀ ਪਛਾਣ ਹੋਈ। ਅਪਰਾਧਾਂ ਸਮੇਂ ਇਨ੍ਹਾਂ ਲੜਕੀਆਂ ਦੀ ਉਮਰ 11 ਤੋਂ 17 ਸਾਲ ਦੇ ਵਿਚਕਾਰ ਸੀ।

ਦੇਸ਼ ਛੱਡ ਕੇ ਜਾ ਚੁੱਕੇ ਕਾਜ਼ੀ ਨੂੰ ਜੁਲਾਈ 2023 ਵਿੱਚ ਯੂਕੇ ਪਰਤਣ ਸਮੇਂ ਹੀਥਰੋ ਹਵਾਈ ਅੱਡੇ ਤੋਂ ਗ੍ਰਿਫ਼ਤਾਰ ਕੀਤਾ ਗਿਆ। ਪਹਿਲੀ ਪੀੜਤਾ ਵੱਲੋਂ ਲਗਾਏ ਗਏ ਦੋਸ਼ਾਂ ਸਬੰਧੀ ਉਸ ਤੋਂ ਪੁੱਛਗਿੱਛ ਕੀਤੀ ਗਈ। ਬਾਅਦ ਵਿੱਚ ਪੁਲੀਸ ਦੀ ਡਿਜੀਟਲ ਫੋਰੈਂਸਿਕ ਯੂਨਿਟ ਨੇ ਉਸ ਦਾ ਮੋਬਾਈਲ ਫ਼ੋਨ ਜ਼ਬਤ ਕਰਕੇ ਜਾਂਚ ਕੀਤੀ। ਇਸ ਵਿੱਚੋਂ ਅਜਿਹੇ ਸਬੂਤ ਮਿਲੇ, ਜਿਨ੍ਹਾਂ ਨੂੰ ਜਾਂਚਕਰਤਾਵਾਂ ਨੇ OCAIT ਵੱਲੋਂ ਹੁਣ ਤੱਕ ਦੇਖੇ ਗਏ ਅਪਰਾਧਾਂ ਦੇ ਸਭ ਤੋਂ ਵੱਡੇ ਨੈੱਟਵਰਕਾਂ ਵਿੱਚੋਂ ਇੱਕ ਮੰਨਿਆ।

ਪੀੜਤਾਂ 'ਤੇ ਪਿਆ ਡੂੰਘਾ ਅਤੇ ਲੰਬੇ ਸਮੇਂ ਤੱਕ ਰਹਿਣ ਵਾਲਾ ਪ੍ਰਭਾਵ

ਸਜ਼ਾ ਸੁਣਾਏ ਜਾਣ ਤੋਂ ਬਾਅਦ ਆਨਲਾਈਨ ਚਾਈਲਡ ਐਬਿਊਜ਼ ਇਨਵੈਸਟੀਗੇਸ਼ਨ ਟੀਮ ਦੀ ਡਿਟੈਕਟਿਵ ਕਾਂਸਟੇਬਲ ਜਾਰਜੀਆ ਹਿਊਜ਼ ਨੇ ਕਿਹਾ ਕਿ ਕਾਜ਼ੀ ਦੇ ਅਪਰਾਧਾਂ ਦਾ ਪੈਮਾਨਾ ਬਹੁਤ ਵੱਡਾ ਸੀ। ਇਸ ਲਈ ਵੱਡੇ ਪੱਧਰ 'ਤੇ ਸਰੋਤਾਂ ਅਤੇ ਪੂਰੀ ਪੁਲੀਸ ਫੋਰਸ ਵਿੱਚ ਨਜ਼ਦੀਕੀ ਤਾਲਮੇਲ ਦੀ ਲੋੜ ਪਈ।

ਉਨ੍ਹਾਂ ਕਿਹਾ ਕਿ ਕਾਜ਼ੀ ਵੱਲੋਂ ਨਿਸ਼ਾਨਾ ਬਣਾਈਆਂ ਗਈਆਂ ਲੜਕੀਆਂ ਛੋਟੀ ਉਮਰ ਦੀਆਂ ਅਤੇ ਕਮਜ਼ੋਰ ਸਥਿਤੀ ਵਿੱਚ ਸਨ। ਉਨ੍ਹਾਂ ਵਿੱਚੋਂ ਬਹੁਤੀਆਂ ਲਈ ਕਾਜ਼ੀ ਨਾਲ ਗੱਲਬਾਤ ਕਰਨਾ ਉਸ ਰਿਸ਼ਤੇ ਦਾ ਪਹਿਲਾ ਅਨੁਭਵ ਸੀ, ਜਿਸ ਨੂੰ ਉਹ ਰੋਮਾਂਟਿਕ ਰਿਸ਼ਤਾ ਸਮਝਦੀਆਂ ਸਨ। ਕਾਜ਼ੀ ਨੇ ਇਸ ਭਰੋਸੇ ਦਾ ਫਾਇਦਾ ਉਠਾਇਆ ਅਤੇ ਉਨ੍ਹਾਂ ਨੂੰ ਇਹ ਵਿਸ਼ਵਾਸ ਦਿਵਾਇਆ ਕਿ ਉਸ ਦਾ ਵਿਵਹਾਰ ਆਮ ਹੈ।

ਡਿਟੈਕਟਿਵ ਕਾਂਸਟੇਬਲ ਹਿਊਜ਼ ਨੇ ਕਿਹਾ ਕਿ ਕਾਜ਼ੀ ਦੇ ਅਪਰਾਧਾਂ ਦਾ ਪੀੜਤਾਂ 'ਤੇ ਡੂੰਘਾ ਅਤੇ ਲੰਬੇ ਸਮੇਂ ਤੱਕ ਰਹਿਣ ਵਾਲਾ ਪ੍ਰਭਾਵ ਪਿਆ ਹੈ। ਕਈ ਲੜਕੀਆਂ ਲਗਾਤਾਰ ਇਸ ਡਰ ਵਿੱਚ ਰਹੀਆਂ ਕਿ ਜੇਕਰ ਉਹ ਉਸ ਦੀਆਂ ਮੰਗਾਂ ਪੂਰੀਆਂ ਨਾ ਕਰ ਸਕੀਆਂ ਤਾਂ ਉਹ ਕੀ ਕਰੇਗਾ। ਕੁਝ ਲੜਕੀਆਂ ਸਾਲਾਂ ਤੱਕ ਇਸ ਡਰ ਨਾਲ ਜੀਵਨ ਬਤੀਤ ਕਰਦੀਆਂ ਰਹੀਆਂ। ਉਨ੍ਹਾਂ ਦੇ ਜੀਵਨ ਦੇ ਮਹੱਤਵਪੂਰਨ ਸਾਲ, ਜੋ ਸਿੱਖਣ ਅਤੇ ਵਿਕਾਸ ਲਈ ਹੋਣੇ ਚਾਹੀਦੇ ਸਨ, ਕਾਜ਼ੀ ਦੇ ਦੁਰਵਿਵਹਾਰ ਕਾਰਨ ਪੈਦਾ ਹੋਏ ਸਦਮੇ ਹੇਠ ਬੀਤੇ।

ਉਨ੍ਹਾਂ ਅੰਤ ਵਿੱਚ ਕਿਹਾ ਕਿ ਉਮੀਦ ਹੈ ਕਿ ਅੱਜ ਦਾ ਫ਼ੈਸਲਾ ਪੀੜਤਾਂ ਨੂੰ ਸਕੂਨ ਦੇਵੇਗਾ, ਕਿਉਂਕਿ ਕਾਜ਼ੀ ਨੂੰ ਉਸ ਦੇ ਕੀਤੇ ਦੀ ਸਜ਼ਾ ਮਿਲ ਗਈ ਹੈ। ਉਨ੍ਹਾਂ ਕਿਹਾ ਕਿ ਉਮੀਦ ਹੈ ਕਿ ਪੀੜਤ ਹੁਣ ਇਹ ਜਾਣਦੇ ਹੋਏ ਆਪਣੀ ਜ਼ਿੰਦਗੀ ਵਿੱਚ ਅੱਗੇ ਵਧ ਸਕਣਗੀਆਂ ਕਿ ਉਹ ਹੁਣ ਕਿਸੇ ਹੋਰ ਨੂੰ ਨੁਕਸਾਨ ਨਹੀਂ ਪਹੁੰਚਾ ਸਕਦਾ।