India Visa System: ਭਾਰਤ ਨੇ ਵੀਜ਼ਾ ਪ੍ਰਣਾਲੀ ’ਚ ਕੀਤੇ ਵੱਡੇ ਬਦਲਾਅ, 13 ਦੀ ਬਜਾਏ ਹੋਣਗੀਆਂ 9 ਮੁੱਖ ਸ਼੍ਰੇਣੀਆਂ

ਭਾਰਤ ਸਰਕਾਰ ਨੇ ਦੇਸ਼ ਦੀ ਵੀਜ਼ਾ ਪ੍ਰਣਾਲੀ ਵਿੱਚ ਵੱਡੇ ਬਦਲਾਅ ਕੀਤੇ ਹਨ। ਗ੍ਰਹਿ ਮੰਤਰਾਲੇ ਨੇ ਮੁੱਖ ਵੀਜ਼ਾ ਸ਼੍ਰੇਣੀਆਂ ਦੀ ਗਿਣਤੀ 13 ਤੋਂ ਘਟਾ ਕੇ 9 ਕਰ ਦਿੱਤੀ ਹੈ, ਜਦਕਿ ਉਪ-ਸ਼੍ਰੇਣੀਆਂ ਨੂੰ 49 ਤੋਂ ਘਟਾ ਕੇ 23 ਕਰ ਦਿੱਤਾ ਗਿਆ ਹੈ। ਇਸ ਨਾਲ ਵਿਦੇਸ਼ੀ ਨਾਗਰਿਕਾਂ ਲਈ ਵੀਜ਼ਾ ਦੀ ਚੋਣ ਕਰਨਾ ਅਤੇ ਅਰਜ਼ੀ ਦੇਣਾ ਆਸਾਨ ਹੋਵੇਗਾ। ਇਸ ਤੋਂ ਇਲਾਵਾ, ਸੈਲਾਨੀ ਵੀਜ਼ਾ ਦਾ ਨਾਮ ਬਦਲ ਕੇ ਵਿਜ਼ਟਰ ਵੀਜ਼ਾ ਰੱਖਿਆ ਗਿਆ ਹੈ। ਵੀਜ਼ਾ ਅਰਜ਼ੀ ਫਾਰਮ ਵਿੱਚ ਭਰੇ ਜਾਣ ਵਾਲੇ ਕਾਲਮਾਂ ਦੀ ਗਿਣਤੀ ਵੀ 65-70 ਫ਼ੀਸਦੀ ਘਟਾ ਦਿੱਤੀ ਗਈ ਹੈ।

ਇਸ ਤੋਂ ਪਹਿਲਾਂ ਅਕਤੂਬਰ 2025 ਵਿੱਚ ਵੀਜ਼ਾ ਪ੍ਰਣਾਲੀ ਵਿੱਚ ਬਦਲਾਅ ਕਰਦਿਆਂ ਮੁੱਖ ਸ਼੍ਰੇਣੀਆਂ ਦੀ ਗਿਣਤੀ 22 ਤੋਂ ਘਟਾ ਕੇ 13 ਅਤੇ ਉਪ-ਸ਼੍ਰੇਣੀਆਂ ਦੀ ਗਿਣਤੀ 63 ਤੋਂ ਘਟਾ ਕੇ 49 ਕੀਤੀ ਗਈ ਸੀ। ਨਵਾਂ ਸਿਸਟਮ ਦਸੰਬਰ 2026 ਤੱਕ ਲਾਗੂ ਹੋ ਜਾਵੇਗਾ। ਫਿਲਹਾਲ ਭਾਰਤ 172 ਦੇਸ਼ਾਂ ਦੇ ਨਾਗਰਿਕਾਂ ਨੂੰ ਈ-ਵੀਜ਼ਾ ਦੀ ਸਹੂਲਤ ਦਿੰਦਾ ਹੈ।

ਵਿਜ਼ਟਰ ਵੀਜ਼ਾ ਦੀਆਂ ਦੋ ਸ਼੍ਰੇਣੀਆਂ

V-1 ਵੀਜ਼ਾ: ਇਹ ਵੀਜ਼ਾ 30 ਦਿਨਾਂ ਲਈ ਵੈਧ ਹੋਵੇਗਾ ਅਤੇ ਇਸ ਤਹਿਤ ਭਾਰਤ ਵਿੱਚ ਕਈ ਵਾਰ ਆਉਣ ਦੀ ਇਜਾਜ਼ਤ ਮਿਲੇਗੀ। ਇਸ ਸ਼੍ਰੇਣੀ ਵਿੱਚ ਯਾਤਰਾ, ਕਾਰੋਬਾਰੀ ਮੀਟਿੰਗਾਂ, ਡਾਕਟਰੀ ਸਲਾਹ-ਮਸ਼ਵਰੇ, ਥੋੜ੍ਹੇ ਸਮੇਂ ਦੇ ਇਲਾਜ ਅਤੇ ਛੋਟੇ ਕੋਰਸਾਂ ਲਈ ਭਾਰਤ ਆਉਣ ਵਾਲੇ ਲੋਕਾਂ ਨੂੰ ਸਹੂਲਤ ਮਿਲੇਗੀ।

V-2 ਵੀਜ਼ਾ: ਇਹ ਵੀਜ਼ਾ ਲੰਬੇ ਸਮੇਂ ਲਈ ਭਾਰਤ ਆਉਣ-ਜਾਣ ਵਾਲੇ ਵਿਦੇਸ਼ੀ ਨਾਗਰਿਕਾਂ ਲਈ ਹੋਵੇਗਾ। ਇਹ ਇੱਕ, ਪੰਜ ਜਾਂ ਦਸ ਸਾਲਾਂ ਲਈ ਜਾਰੀ ਕੀਤਾ ਜਾ ਸਕੇਗਾ। ਇਸ ਤੋਂ ਇਲਾਵਾ, ਇਸ ਵੀਜ਼ੇ ਤਹਿਤ ਪਰਬਤਾਰੋਹਣ ਦੀ ਵੀ ਇਜਾਜ਼ਤ ਹੋਵੇਗੀ।

ਮੈਡੀਕਲ ਵੀਜ਼ਾ ਦੀਆਂ ਵੱਖਰੀਆਂ ਸ਼੍ਰੇਣੀਆਂ

ਮੈਡੀਕਲ ਵੀਜ਼ਾ ਨੂੰ ਆਮ ਇਲਾਜ ਅਤੇ ਆਯੂਸ਼ ਇਲਾਜ ਲਈ ਵੱਖ-ਵੱਖ ਸ਼੍ਰੇਣੀਆਂ ਵਿੱਚ ਵੰਡਿਆ ਗਿਆ ਹੈ। M-1 ਵੀਜ਼ਾ ਆਮ ਇਲਾਜ ਲਈ ਅਤੇ M-3 ਵੀਜ਼ਾ ਆਯੂਸ਼ ਇਲਾਜ ਲਈ ਜਾਰੀ ਕੀਤਾ ਜਾਵੇਗਾ। ਦੋਵੇਂ ਵੀਜ਼ੇ ਇੱਕ ਸਾਲ ਲਈ ਵੈਧ ਹੋਣਗੇ ਅਤੇ ਇਨ੍ਹਾਂ ਤਹਿਤ ਭਾਰਤ ਵਿੱਚ ਕਈ ਵਾਰ ਆਉਣ ਦੀ ਇਜਾਜ਼ਤ ਮਿਲੇਗੀ।

ਮਰੀਜ਼ਾਂ ਦੇ ਨਾਲ ਆਉਣ ਵਾਲੇ ਸਹਾਇਕਾਂ ਲਈ M-2 ਅਤੇ M-4 ਵੀਜ਼ਾ ਦੀ ਵਿਵਸਥਾ ਕੀਤੀ ਗਈ ਹੈ।

ਵਿਦਿਆਰਥੀ ਵੀਜ਼ਾ ਦੀਆਂ ਦੋ ਸ਼੍ਰੇਣੀਆਂ

S-1 ਵੀਜ਼ਾ: ਇਹ ਵੀਜ਼ਾ ਸਕੂਲ, ਅੰਡਰਗ੍ਰੈਜੂਏਟ ਅਤੇ ਪੋਸਟ ਗ੍ਰੈਜੂਏਟ ਪੜ੍ਹਾਈ ਕਰਨ ਵਾਲੇ ਵਿਦੇਸ਼ੀ ਵਿਦਿਆਰਥੀਆਂ ਲਈ ਹੋਵੇਗਾ।

S-2 ਵੀਜ਼ਾ: ਇਹ ਵੀਜ਼ਾ ਪੀਐੱਚਡੀ ਅਤੇ ਖੋਜ ਕਰਨ ਵਾਲੇ ਵਿਦਿਆਰਥੀਆਂ ਲਈ ਉਪਲਬਧ ਹੋਵੇਗਾ। ਇਸ ਵਿੱਚ ਇੰਟਰਨਸ਼ਿਪ ਅਤੇ ਐਕਸਚੇਂਜ ਪ੍ਰੋਗਰਾਮ ਵੀ ਸ਼ਾਮਲ ਹੋਣਗੇ।

ਨਵੀਆਂ ਵਪਾਰਕ ਵੀਜ਼ਾ ਸ਼੍ਰੇਣੀਆਂ

B-1 ਵੀਜ਼ਾ: ਇਹ ਵੀਜ਼ਾ ਲੰਬੇ ਸਮੇਂ ਦੀਆਂ ਵਪਾਰਕ ਗਤੀਵਿਧੀਆਂ ਅਤੇ ਭਾਰਤ ਵਿੱਚ ਕਾਰੋਬਾਰ ਸ਼ੁਰੂ ਕਰਨ ਦੇ ਇੱਛੁਕ ਵਿਦੇਸ਼ੀ ਨਾਗਰਿਕਾਂ ਲਈ ਹੋਵੇਗਾ।

B-2 ਵੀਜ਼ਾ: ਇਹ ਵੀਜ਼ਾ ਥੋੜ੍ਹੇ ਸਮੇਂ ਦੀਆਂ ਵਪਾਰਕ ਗਤੀਵਿਧੀਆਂ, ਕਾਨਫਰੰਸਾਂ, ਖੇਡਾਂ ਅਤੇ ਫ਼ਿਲਮਾਂ ਨਾਲ ਸਬੰਧਤ ਗਤੀਵਿਧੀਆਂ ਲਈ ਜਾਰੀ ਕੀਤਾ ਜਾਵੇਗਾ।