Apple Services Outage: ਐਪਲ ਦੀਆਂ iCloud, App Store ਸਮੇਤ ਕਈ ਸੇਵਾਵਾਂ ਠੱਪ, ਕੰਪਨੀ ਨੇ ਸਾਈਬਰ ਹਮਲੇ ਤੋਂ ਕੀਤਾ ਇਨਕਾਰ

Apple Services Outage: ਐਪਲ ਦੀਆਂ iCloud, App Store ਸਮੇਤ ਕਈ ਸੇਵਾਵਾਂ ਠੱਪ, ਕੰਪਨੀ ਨੇ ਸਾਈਬਰ ਹਮਲੇ ਤੋਂ ਕੀਤਾ ਇਨਕਾਰ

Apple Services Outage: ਐਪਲ (Apple) ਦੀਆਂ iCloud, App Store, Apple Pay ਅਤੇ Apple Music ਸਮੇਤ ਕਈ ਸੇਵਾਵਾਂ ਵਿੱਚ ਵੱਡੇ ਪੱਧਰ ’ਤੇ ਵਿਘਨ ਪੈਣ ਤੋਂ ਬਾਅਦ ਕੰਪਨੀ ਨੇ ਇਸ ਦਾ ਕਾਰਨ ਅੰਦਰੂਨੀ ਸਾਫਟਵੇਅਰ ਅਪਡੇਟ ਦੱਸਿਆ ਹੈ। ਫੌਕਸ ਬਿਜ਼ਨਸ (Fox Business) ਦੀ ਰਿਪੋਰਟ ਅਨੁਸਾਰ, ਐਪਲ ਨੇ ਪੁਸ਼ਟੀ ਕੀਤੀ ਹੈ ਕਿ ਇਸ ਅਪਡੇਟ ਕਾਰਨ ਉਸ ਦੇ ਕਈ ਪਲੇਟਫਾਰਮ ਪ੍ਰਭਾਵਿਤ ਹੋਏ ਸਨ। ਕੰਪਨੀ ਨੇ ਕਿਹਾ ਕਿ ਜ਼ਿਆਦਾਤਰ ਸਿਸਟਮ ਬਹਾਲ ਕਰ ਦਿੱਤੇ ਗਏ ਹਨ ਅਤੇ ਇਸ ਘਟਨਾ ਪਿੱਛੇ ਸਾਈਬਰ ਹਮਲੇ ਦੀ ਸੰਭਾਵਨਾ ਨਹੀਂ ਹੈ।

ਐਪਲ ਨੇ ਮੰਗਲਵਾਰ ਦੁਪਹਿਰ ਸਥਾਨਕ ਸਮੇਂ ਅਨੁਸਾਰ ਇਸ ਵਿਘਨ ਦੀ ਪੁਸ਼ਟੀ ਕੀਤੀ। ਕੰਪਨੀ ਨੇ ਇੱਕ ਬਿਆਨ ਵਿੱਚ ਕਿਹਾ ਕਿ ਅੰਦਰੂਨੀ ਅਪਡੇਟ ਕਾਰਨ ਕੁਝ ਸੇਵਾਵਾਂ ਠੱਪ ਹੋਣ ਤੋਂ ਬਾਅਦ ਉਸ ਦੇ ਕਈ ਸਿਸਟਮ ਮੁੜ ਆਨਲਾਈਨ ਹੋ ਗਏ ਹਨ। ਇਸ ਦੇ ਨਾਲ ਹੀ ਬਾਕੀ ਪ੍ਰਭਾਵਿਤ ਸਿਸਟਮਾਂ ਨੂੰ ਵੀ ਜਲਦੀ ਤੋਂ ਜਲਦੀ ਬਹਾਲ ਕਰਨ ਲਈ ਕੰਮ ਕੀਤਾ ਜਾ ਰਿਹਾ ਹੈ।

ਫੌਕਸ ਬਿਜ਼ਨਸ ਨੇ ਐਪਲ ਦੇ ਬਿਆਨ ਦਾ ਹਵਾਲਾ ਦਿੰਦਿਆਂ ਕਿਹਾ, "ਅੱਜ ਸਵੇਰੇ ਇੱਕ ਅੰਦਰੂਨੀ ਅਪਡੇਟ ਕਾਰਨ ਕੁਝ ਸੇਵਾਵਾਂ ਠੱਪ ਹੋਣ ਤੋਂ ਬਾਅਦ ਸਾਡੇ ਕਈ ਸਿਸਟਮ ਮੁੜ ਚੱਲ ਪਏ ਹਨ। ਅਸੀਂ ਬਾਕੀ ਸਿਸਟਮਾਂ ਨੂੰ ਜਲਦੀ ਤੋਂ ਜਲਦੀ ਆਨਲਾਈਨ ਕਰਨ ਲਈ ਕੰਮ ਕਰ ਰਹੇ ਹਾਂ।"

iCloud, Apple Pay ਅਤੇ App Store ਵੀ ਹੋਏ ਪ੍ਰਭਾਵਿਤ

ਫੌਕਸ ਬਿਜ਼ਨਸ ਮੁਤਾਬਕ, ਇਹ ਵਿਘਨ ਉਸ ਸਮੇਂ ਸਾਹਮਣੇ ਆਇਆ ਜਦੋਂ ਆਊਟੇਜ ਟਰੈਕ ਕਰਨ ਵਾਲੀ ਵੈੱਬਸਾਈਟ 'ਡਾਊਨਡਿਟੈਕਟਰ' (Downdetector) ’ਤੇ ਐਪਲ ਦੀਆਂ ਸੇਵਾਵਾਂ ਵਿੱਚ ਸਮੱਸਿਆਵਾਂ ਦੀਆਂ ਰਿਪੋਰਟਾਂ ਤੇਜ਼ੀ ਨਾਲ ਵਧਣ ਲੱਗੀਆਂ। ਯੂਜ਼ਰਾਂ ਨੇ iCloud ਵਿੱਚ ਲੌਗਇਨ ਕਰਨ ਸਬੰਧੀ ਮੁਸ਼ਕਲਾਂ ਦੇ ਨਾਲ-ਨਾਲ Apple Pay, Apple Music, Apple Card ਅਤੇ App Store ਦੀਆਂ ਸੇਵਾਵਾਂ ਪ੍ਰਭਾਵਿਤ ਹੋਣ ਦੀ ਸ਼ਿਕਾਇਤ ਕੀਤੀ।

ਦਿਨ ਭਰ ਐਪਲ ਯੂਜ਼ਰਾਂ ਨੇ ਆਪਣੇ iCloud ਖਾਤਿਆਂ ਤੱਕ ਪਹੁੰਚ ਨਾ ਹੋਣ ਦੀਆਂ ਸਮੱਸਿਆਵਾਂ ਦੱਸੀਆਂ। iCloud ਵਿੱਚ ਯੂਜ਼ਰਾਂ ਦੀਆਂ ਫੋਟੋਆਂ, ਦਸਤਾਵੇਜ਼ ਅਤੇ ਹੋਰ ਨਿੱਜੀ ਡਾਟਾ ਸਟੋਰ ਹੁੰਦਾ ਹੈ। ਇਸ ਤੋਂ ਇਲਾਵਾ ਕਈ ਯੂਜ਼ਰਾਂ ਨੇ Apple Pay, Apple Music, Apple Card ਅਤੇ App Store ਦੀ ਵਰਤੋਂ ਨਾ ਕਰ ਸਕਣ ਦੀ ਵੀ ਰਿਪੋਰਟ ਕੀਤੀ।

NSA ਅਤੇ FAA ਵਿੱਚ ਵੀ ਸਾਹਮਣੇ ਆਈਆਂ ਸਨ ਤਕਨੀਕੀ ਸਮੱਸਿਆਵਾਂ

ਫੌਕਸ ਬਿਜ਼ਨਸ ਦੀ ਰਿਪੋਰਟ ਅਨੁਸਾਰ, ਇਸ ਤੋਂ ਪਹਿਲਾਂ ਅਮਰੀਕੀ ਸਰਕਾਰੀ ਏਜੰਸੀਆਂ ਨਾਲ ਸਬੰਧਤ ਤਕਨੀਕੀ ਵਿਘਨਾਂ ਦੀਆਂ ਵੀ ਰਿਪੋਰਟਾਂ ਸਾਹਮਣੇ ਆਈਆਂ ਸਨ। ਸੰਘੀ ਅਧਿਕਾਰੀਆਂ ਨੇ ਮੰਗਲਵਾਰ ਨੂੰ ਨੈਸ਼ਨਲ ਸਕਿਓਰਿਟੀ ਏਜੰਸੀ (NSA) ਦੇ ਸਿਸਟਮ ਵਿੱਚ ਆਈ ਅਸਥਾਈ ਖਰਾਬੀ ਅਤੇ ਪਿਛਲੇ ਹਫ਼ਤੇ ਫੈਡਰਲ ਐਵੀਏਸ਼ਨ ਐਡਮਿਨਿਸਟ੍ਰੇਸ਼ਨ (FAA) ਦੇ ਨੈੱਟਵਰਕ ਵਿੱਚ ਆਏ ਵਿਘਨ ਦਾ ਕਾਰਨ ਸਾਈਬਰ ਖਤਰਿਆਂ ਦੀ ਬਜਾਏ ਤਕਨੀਕੀ ਸਮੱਸਿਆਵਾਂ ਦੱਸਿਆ ਸੀ।